चिंचणी मध्ये अवैध  सावकारा कडून बळी, बळी घेणाऱ्या सावकारांना कोपऱ्यापासून ते ढोपऱ्यापर्यंत सोलण्याची  सर्वसामान्य नागरिकांची मागणी

डहाणू तालुक्यातील चिंचणी येथील एका कष्टकरी उद्योजकाच्या आत्महत्येचा धक्कादायक प्रकार उघडकीस आला आहे. फिर्यादी जय किशोर दवणे (चिंचणी) यांनी दिलेल्या माहितीनुसार, त्यांचे वडील कै. किशोर दवणे हे डायमेकिंग व्यवसायातून कुटुंबाचा उदरनिर्वाह करत होते. व्यवसाय वाढीसाठी त्यांनी नवीन वायरकट मशिन खरेदी केली होती तसेच, वर्कशॉपचे नूतनीकरणही केले होते. यासाठी विविध ठिकाणांहून कर्ज घेतले होते. मात्र, अलीकडील काळात व्यवसायात आलेल्या मंदीमुळे कर्जाचे हप्ते वेळेवर भरणे शक्य होत नव्हते.

या आर्थिक अडचणीच्या काळात त्यांनी काही खाजगी सावकारांकडून व्याजाने पैसे घेतले. सुरुवातीला मदतीचा हात वाटणारी ही रक्कम पुढे जाचक ठरली. घेतलेल्या पैशांपेक्षा अधिक रक्कम परत देऊनही व्याज थकल्याचे सांगत संबंधित सावकारांकडून सातत्याने फोनवरून मानसिक छळ, शिवीगाळ व धमक्या दिल्या जात होत्या. रस्त्यात अडवून चारचौघांत अपमान केल्याने कै. दवणे यांचा मानसिक ताण कमालीचा वाढला होता. अखेर या त्रासाला कंटाळून दि. २ ऑगस्ट २०२५ रोजी त्यांनी आपल्या राहत्या घरातील बेडरूममध्ये गळफास घेऊन आत्महत्या केली. या घटनेनंतर सुरुवातीला अकस्मात मृत्यूची नोंद करण्यात आली होती.

मात्र, दि. ११ ऑगस्ट रोजी घराची साफसफाई सुरू असताना बेडखाली तीन पानी सुसाईड नोट आढळून आली. या सुसाईड नोटमध्ये अवैध व्याज व्यवहार, सातत्याचा मानसिक छळ व धमक्यांमुळे आत्महत्येचा निर्णय घेतल्याचे स्पष्टपणे नमूद करण्यात आले असून, नितीन उमराव जैन (वाणगाव), इंद्रदेव विश्वनाथ गुप्ता (चिंचणी), तुषार हरेश साळसकर (चिंचणी), अरविंद रखमाजी पाटील उर्फ पिंटा (अंधेरी, मुंबई) व मंगेश भालचंद्र चुरी (चिंचणी) या पाच खाजगी सावकारांची नावे स्पष्टपणे लिहिण्यात आली आहेत.

यानंतर मृताचा मुलगा जय दवणे यांच्या तक्रारीवरून दि. २० डिसेंबर रोजी वाणगाव पोलीस ठाण्यात संबंधित पाच जणांविरोधात भारतीय नागरिक सुरक्षा संहिता २०२३ तसेच महाराष्ट्र सावकारी (नियमन) अधिनियम २०१४ अंतर्गत आत्महत्येस प्रवृत्त केल्याचा गंभीर गुन्हा दाखल करण्यात आला आहे. सर्व आरोपी फरार असून पुढील तपास वाणगाव पोलीस ठाण्याचे अधिकारी करत असल्याची माहिती वाणगाव पोलीस स्टेशनचे सहाय्यक पोलीस निरीक्षक तुषार पाचपुते यांनी दिली.